பிறப்புச் சான்றிதழ் போன்ற ஆவணங்கள் இல்லாமை, ஒரு சிறுவனின் அல்லது சிறுமியின் பாடசாலைக் கல்விக்குத் தடையாக இருக்கக்கூடாது என்று அமைச்சர் சரோஜா சாவித்திரி போல்ராஜ் வலியுறுத்தியுள்ளார்.
மாத்தறை மாவட்ட சிறுவர் மற்றும் மகளிர் குழு கூட்டத்தில் கலந்துகொண்ட போதே அமைச்சர் இந்தக் கருத்தை முன்வைத்தார்.
மாத்தறை மாவட்டத்தின் தோட்டப் பகுதிகளில் வசிக்கும் பல சிறுவர்களுக்குப் பிறப்புச் சான்றிதழ் இல்லாததால், அவர்கள் பாடசாலைகளில் இணைவதில் பெரும் சிக்கல்களை எதிர்கொள்வது குறித்துச் சுட்டிக்காட்டப்பட்டது.
இத்தகைய ஆவணச் சிக்கல்கள் ஒரு பிள்ளையின் எதிர்காலக் கல்வி உரிமையைப் பறிக்கும் காரணியாக இருக்கக் கூடாது என்றும், இதற்குத் தகுந்த தீர்வு காணப்பட வேண்டும் என்றும் அமைச்சர் அதிகாரிகளுக்கு அறிவுறுத்தினார்.
சிறுவர் துஷ்பிரயோகம், போதைப்பொருள் பாவனை மற்றும் சிறுவர்களுக்கு எதிரான வன்முறைகளை ஒழிப்பதற்கான விசேட நடவடிக்கைகள் குறித்தும் இக்கூட்டத்தில் விரிவாக ஆராயப்பட்டது.
கல்வி என்பது ஒவ்வொரு பிள்ளையின் அடிப்படை உரிமை என்பதை உறுதிப்படுத்தும் வகையில் அமைச்சரின் இந்த வலியுறுத்தல் அமைந்துள்ளது.
