இலங்கையின் தெற்கு ஆழ்கடல் பிராந்தியத்தில் கடற்படையினர் மேற்கொண்ட விசேட ரோந்து நடவடிக்கையின் போது, ஆயுதங்கள் மற்றும் போதைப்பொருட்களை ஏற்றி வந்ததாகச் சந்தேகிக்கப்படும் பல நாள் மீன்பிடி படகு ஒன்று மடக்கிப் பிடிக்கப்பட்டுள்ளது.
நாட்டைச் சுற்றியுள்ள கடல் பிராந்தியங்களின் பாதுகாப்பை உறுதிப்படுத்தும் நோக்கில் கடற்படையினர் வழக்கமான ரோந்துப் பணிகளை மேற்கொண்டு வருகின்றனர். இதன்போது, தெற்கு ஆழ்கடல் பகுதியில் சந்தேகத்திற்கிடமான முறையில் பயணித்த இந்த மீன்பிடி படகு கடற்படையினரின் கண்காணிப்பு வலயத்திற்குள் சிக்கியது.
கடற்படையினரால் இடைமறிக்கப்பட்ட குறித்த படகில் மேலதிக சோதனைகள் மேற்கொள்ளப்பட்டன. இதன்போது, சட்டவிரோத ஆயுதங்கள் மற்றும் போதைப்பொருட்கள் இருக்கலாம் என்ற சந்தேகத்தின் அடிப்படையில், படகையும் அதில் இருந்தவர்களையும் தமது கட்டுப்பாட்டிற்குள் கொண்டு வந்துள்ளனர். தற்போது, மேலதிக சட்ட நடவடிக்கைகளுக்காக குறித்த படகு கரைக்கு அழைத்து வரப்பட்டு வருகிறது.
