பேலியகொடை மெனிங் சந்தையில் சேகரிக்கப்படும் மீன் கழிவுகளைப் பயன்படுத்தி தனியார் நிறுவனம் ஒன்று முன்னெடுக்கும் உர உற்பத்திச் செயற்பாட்டினால், அப்பகுதி மக்களுக்கு ஏற்பட்டுள்ள சுகாதாரப் பாதிப்புகள் மற்றும் சூழல் மாசடைவு குறித்து முழுமையான விசாரணை நடத்தி அறிக்கை சமர்ப்பிக்குமாறு கொழும்பு மேலதிக நீதிவான் எச்.டி.டி.ஜே. பிரேமரத்ன உத்தரவிட்டுள்ளார்.
குறித்த சந்தைக்கு அருகாமையில் அமைந்துள்ள இந்த உர உற்பத்தி நிலையத்திலிருந்து வெளியேறும் கடும் துர்நாற்றம் காரணமாக, அப்பகுதியில் வசிக்கும் பொதுமக்கள் பெரும் அசௌகரியங்களுக்கு உள்ளாவதாக நீதிமன்றில் முறைப்பாடுகள் முன்வைக்கப்பட்டன. இந்தத் துர்நாற்றம் மற்றும் கழிவு முகாமைத்துவம் முறையாகப் பேணப்படாமை சூழலுக்குப் பெரும் அச்சுறுத்தலாக அமைந்துள்ளதாக குடியிருப்பாளர்கள் சுட்டிக்காட்டியுள்ளனர்.
இந்த விவகாரம் தொடர்பான விசாரணையின் போது, சம்பந்தப்பட்ட தனியார் நிறுவனம் நீதிமன்றில் முன்னிலையாகி விளக்கம் அளித்தது. அந்த நிறுவனத்தின் தொழில்நுட்ப அறிக்கையின்படி, உற்பத்தியின் போது வெளியாகும் மணம் ஒரு குறிப்பிட்ட எல்லைக்குள் மட்டுமே காணப்படுவதாக அந்நிறுவனம் வாதிட்டது.
இரு தரப்பு வாதங்களையும் பரிசீலித்த மேலதிக நீதிவான், தனியார் நிறுவனம் வழங்கிய தொழில்நுட்ப அறிக்கைகள் உட்பட அனைத்து ஆவணங்களையும் மீள்பரிசீலனை செய்யுமாறு உத்தரவிட்டார். அத்துடன், பேலியகொடை பொதுச் சுகாதாரப் பரிசோதகர் (PHI) இது குறித்து கள ஆய்வு நடத்தி, விரிவான அறிக்கையை எதிர்வரும் ஜூன் மாதம் 3ஆம் திகதிக்குள் நீதிமன்றில் சமர்ப்பிக்க வேண்டும் என்றும் கட்டளையிட்டார்.
