அமெரிக்கா மற்றும் ஈரான் இடையிலான பேச்சுவார்த்தைகள் போரை முடிவுக்குக் கொண்டுவரக்கூடும் என டொனால்ட் ட்ரம்ப் தெரிவித்ததைத் தொடர்ந்து, இன்று உலகளாவிய எண்ணெய் விலைகள் கடுமையாக சரிந்தன.
உலகளாவிய அளவுகோலான பிரென்ட் கச்சா எண்ணெய் 7%க்கும் மேல் குறைந்து ஒரு பேரல் 99 டொலருக்கு கீழ் சரிந்தது. அதேவேளை, அமெரிக்காவின் WTI எண்ணெய் விலை 8% குறைந்து ஒரு பேரல் 90 டொலராக வீழ்ச்சி கண்டது.
மத்திய கிழக்கில் அமைதி தீர்வை நோக்கி அமெரிக்கா–ஈரான் இடையே “நல்ல மற்றும் பயனுள்ள” உரையாடல்கள் நடைபெற்று வருவதாக ட்ரம்ப் தெரிவித்துள்ளார். மேலும், சாத்தியமான முன்னேற்றத்தை முன்னிட்டு, ஈரானின் எரிசக்தி உள்கட்டமைப்புகள் மீதான தாக்குதல்களை தற்காலிகமாக ஒத்திவைக்க உத்தரவிட்டதாகவும் கூறினார்.
இதற்கிடையில், ஹோர்முஸ் ஜலசந்தி மூடப்பட்டதால் உலகளாவிய எண்ணெய் விநியோகத்தில் பெரும் பாதிப்பு ஏற்பட்டுள்ளதாக சர்வதேச எரிசக்தி திணைக்களம் எச்சரித்துள்ளது.
