பிலிப்பைன்ஸின் மணிலா நகருக்கு உத்தியோகபூர்வ விஜயம் மேற்கொண்டுள்ள பிரதமர் ஹரிணி அமரசூரிய, நேற்று (மார்ச் 10) ஆசிய அபிவிருத்தி வங்கியின் (ADB) உயர் அதிகாரிகளைச் சந்தித்துக் கலந்துரையாடினார். இந்தச் சந்திப்பின் போது இலங்கையின் பொருளாதார மீட்சி மற்றும் எதிர்கால அபிவிருத்தித் திட்டங்கள் குறித்து விரிவாக ஆராயப்பட்டது.
இலங்கையின் பொருளாதாரத்தை ஸ்திரப்படுத்துவதற்கும், நெருக்கடியிலிருந்து மீள்வதற்கும் அரசாங்கம் எடுத்து வரும் முயற்சிகளை ADB தலைவர் இதன்போது பாராட்டினார். அத்துடன், இரு தரப்புக்கும் இடையிலான வலுவான பங்காளித்துவத்தை அவர் மீண்டும் உறுதிப்படுத்தினார்.
‘டிட்வா’ (Ditwah) சூறாவளியால் ஏற்பட்ட பாதிப்புகளின் போது ஆசிய அபிவிருத்தி வங்கி வழங்கிய தொடர்ச்சியான ஆதரவிற்கு பிரதமர் தனது நன்றியைத் தெரிவித்தார்.
வங்கியின் துணைத் தலைவர் யிங்மிங் யாங் (Yingming Yang) மற்றும் பணிப்பாளர் நாயகம் கிறிஸ்டின் எங்ஸ்ட்ரோம் ஆகியோருடனும் பிரதமர் பேச்சுவார்த்தை நடத்தினார். இதன் போது கல்வி, சுகாதாரம், சமூக மேம்பாடு மற்றும் நிதித்துறை சீர்திருத்தங்கள் குறித்து ஆலோசிக்கப்பட்டது.
இந்த விஜயத்தின் ஒரு பகுதியாக, கல்வி மற்றும் திறன் மேம்பாடு குறித்த கொள்கை உரையாடலிலும் (Policy Dialogue) பிரதமர் பங்கேற்றார். இதில் கல்வித்துறையில் வெறும் உட்கட்டமைப்பு வசதிகளை மட்டும் மேம்படுத்தாமல், மனிதவள மேம்பாடு மற்றும் கற்பித்தல் தரத்தை உயர்த்துவதில் அதிக கவனம் செலுத்த வேண்டும் என அவர் வலியுறுத்தினார்.
பிலிப்பைன்ஸ் மற்றும் இலங்கை இடையிலான கல்வி சார் ஒத்துழைப்பை விரிவுபடுத்துவது குறித்தும், குறிப்பாக தொழில்நுட்ப மற்றும் தொழிற்பயிற்சி (TVET) துறையில் நிலவும் வாய்ப்புகள் குறித்தும் இதன்போது ஆராயப்பட்டது.
இந்தச் சந்திப்புகளின் மூலம், இலங்கையின் நிலையான அபிவிருத்தி மற்றும் உள்ளடக்கிய பொருளாதார வளர்ச்சியை நோக்கி ஆசிய அபிவிருத்தி வங்கி தனது முழுமையான ஆதரவை மீண்டும் உறுதிப்படுத்தியுள்ளது.
