சட்டவிரோதமாக ஈட்டப்பட்டதாகச் சந்தேகிக்கப்படும் சுமார் 283,300,000 (28 கோடிக்கும் அதிக) ரூபா பணம் மற்றும் இரண்டு சொகுசு வாகனங்களுடன் சந்தேக நபர் ஒருவர் பணமோசடி தடுப்புச் சட்டத்தின் கீழ் கைது செய்யப்பட்டுள்ளார்.
சட்டவிரோத சொத்துக்கள் விசாரணைப் பிரிவின் அதிகாரிகளுக்குக் கிடைத்த இரகசியத் தகவலுக்கு அமைய, நேற்று (19) மேற்கொள்ளப்பட்ட விசேட சுற்றிவளைப்பின் போதே இப்பாகமுவ பிரதேசத்தைச் சேர்ந்த 40 வயதுடைய நபர் கைது செய்யப்பட்டார்.
விசாரணையில் வெளியான திடுக்கிடும் தகவல்கள்: வெளிநாட்டில் தலைமறைவாக உள்ளதாகச் சந்தேகிக்கப்படும் ஒரு முக்கிய போதைப்பொருள் கடத்தல்காரருடன் இந்த நபர் தொலைபேசி ஊடாகத் தொடர்புகளைப் பேணி வந்துள்ளார். அந்த கடத்தல்காரரின் ஆலோசனையின் பேரில், இலங்கையிலுள்ள ஏனைய போதைப்பொருள் வியாபாரிகளிடமிருந்து பணத்தைச் சேகரித்து வந்துள்ளமை முதற்கட்ட விசாரணைகளில் அம்பலமாகியுள்ளது.
கைது செய்யப்பட்ட நபரிடமிருந்து கைப்பற்றப்பட்ட வாகனங்கள் இரண்டும், போதைப்பொருள் கடத்தல் மூலம் ஈட்டப்பட்ட கறுப்புப் பணத்தைக் கொண்டு கொள்வனவு செய்யப்பட்டவை என பொலிஸார் உறுதிப்படுத்தியுள்ளனர்.
மேலதிக நடவடிக்கை: சந்தேக நபர் இன்று (20) குருநாகல் நீதவான் நீதிமன்றத்தில் ஆஜர்படுத்தப்படவுள்ளார். சட்டவிரோத சொத்துக்கள் விசாரணைப் பிரிவினர் இச்சம்பவம் தொடர்பில் மேலதிக விசாரணைகளைத் தீவிரப்படுத்தியுள்ளனர்.